Ugu yaraan 28 qof oo Soomaali ah ayaa ku dhintay shil naxdin leh, kadib markii la waayay doontii ay la socdeen ee la sheegay inay xeebta kala degatay. Warbixin kasoo baxday wakaaladda dekedaha, badda, iyo webiga ee dalka Madagascar ayaa xaqiijisay geerida muhaajiriintan, iyadoo la sheegay in xaaladda ay tahay mid aad u murugo badan.
Safiirka Midowga Afrika ee Soomaaliya, Mudane Cabdullahi Warfaa, oo wareysi siiyay Warbaahinta Qaranka, ayaa faahfaahin ka bixiyay doonyo sida muhaajiriin Soomaali ah, kuwaas oo ku qalibmay dalka Madagascar. Doonyahaas, oo ahayd labo dooni, ayaa saarnaa in ka badan 70 qof, kuwaas oo ku safraayay si ay uga soo baxaan xaaladda adag ee dalkooda. Mudane Warfaa ayaa sheegay in doonyahani ay saarnayeen 70 qof, waxaana ku dhintay in ka badan 28 qof oo Soomaali ah, halka 48 kale ay ku dhaawacmeen. Kaluumeysatada Madagaskar ayaa ku guuleystay in ay badbaadiyaan dadkaasi, iyagoo soo qaaday kuwa dhaawacmay.
Safiir Warfaa ayaa sidoo kale sheegay in safaaradda Soomaaliya ee Madagaskar ay qorsheynayso sidii loogu soo celin lahaa dadka badbaaday, iyadoo si dhow loola socon doono xaaladda dadka dhaawacmay ee hadda gacanta ku haya dowladda Madagaskar. Wuxuu intaas ku daray in safaaradda ay dadaallo ka waddo sidii loo ogaan lahaa halka laga soo qaaday dadkaasi iyo meesha ay u socdeen.
Ugu dambeyntii, Safiir Cabdullahi Warfaa ayaa tacsi u diray dhammaan eheladii iyo qoysaskii ay ka geeriyoodeen muhaajiriintan Soomaaliyeed, isagoo xusay in ay si buuxda uga shaqeyn doonaan sidii dadkaasi loogu soo celin lahaa dalkooda iyo sidii loo xaqiijin lahaa xaaladda badbaadada ee dadka dhaawacmay.
